កសិដ្ឋានផលិតទឹកដោះគោ

បញ្ហាប្រឈម Challenge របស់កម្ពុជាគឺ៖ (១) នៅបរទេស គោញី ១ ក្បាលផលិតទឹកដោះបាន ៦៥ លីត្រ/ថ្ងៃ ចំណែកកម្ពុជាបានតែ ពី ១០ ទៅ ២០ លីត្រ/ថ្ងៃ គឺដោយសារ ពូជគោ។ (២) មេគោរពូជមានតម្លៃខ្ពស់ កសិករលក់គោយកលុយ ដោយសារអ្នកទិញគេហ៊ានឲ្យថ្លៃខ្ពស់ ជាវិច្ឆេទកម្មគោទឹកដោះព្រោះបរទេសត្រូវការនាំចូលទឹកដោះគោ ! (៣) គឺបញ្ហាចំណីគោគ្មាននិវរន្តភាពពេញមួយឆ្នាំ ដោយសារគ្មានបច្ចេកទេសដាំស្មៅ។

កសិដ្ឋានផលិតទឹកដោះគោ ធំដំបូងគេមួយនៅកម្ពុជា គ្រោងនឹងនាំចូលគោទឹកដោះពីក្រៅប្រទេស ប្រមាណ ១ពាន់ក្បាល បន្ថែមទៀត ដើម្បីផលិតទឹកដោះគោសម្រាប់ផ្គត់ផ្គង់លើទីផ្សារដែលកំពុងមានតម្រូវការខ្ពស់ ខណៈដែលបច្ចុប្បន្ន កសិដ្ឋាននេះ មានគោ ប្រមាណ ២០០ ក្បាល។លោក ខេននី ម្ចាស់កសិដ្ឋានម៉ូម៉ូ ហ្វាម (MOMO FARM) បានឲ្យ​​ដឹងថា លោកបាន​ចាប់ផ្តើម​មុខរបរ​​នេះកាល​ពីអំឡុង​ឆ្នាំ២០១៦ បើគិត​គឺ ជិត​៣ឆ្នាំហើយ ដោយផ្តើម​ចេញពី​សត្វ​គោ​ចំនួន​ជាង ១០​ក្បាល ខណៈសព្វថ្ងៃកសិដ្ឋាន​មាន​សត្វគោ​​ប្រមាណ​ជាង ២០០ក្បាល​ហើយ សរុបទាំង​កូនគោ មេគោ និងគោ​ឈ្មោល។ លោកបាន​បន្ថែមថា បន្ទាប់ពី​​ក្រុមហ៊ុន​ផលិត​ទឹកស្រស់​របស់​លោកបាន​ទទួល​អាជ្ញាបណ្ណ​ពីក្រសួង​កសិកម្ម ​និងពាណិជ្ជកម្ម​រួចមក លោក​​មានគម្រោង​នឹង​ពង្រីក​​កសិដ្ឋាន​​​បន្ថែមទៀត ដោយនៅ​​ឆ្នាំក្រោយ​លោក នឹងនាំចូល​សត្វគោ ១.០០០​ក្បាល​​បន្ថែម​ទៀត​មក​កាន់​ប្រទេសកម្ពុជា។មានចំងាយ​​ប្រមាណ​​ជិត៤​គីឡូម៉ែត​ពីរាជធានីភ្នំពេញ ដោយត្រូវធ្វើ​ឆ្លងកាត់​កំពង់​ចម្លង​ភ្នំពេញ-អរិយក្សត្រ កសិដ្ឋាន​ផលិត​ទឹកដោះគោ​ស្រស់​ម៉ូម៉ូហ្វាម (MOMO FARM) មានទីតាំង​ស្ថិតនៅ​ក្នុងភូមិ​អរិយក្សត្រ ឃុំអរិយក្សត្រ​ ស្រុកល្វាឯម ខេត្តកណ្តាល។ តាម​ពិត​កសិដ្ឋាន​ផលិត​ទឹកដោះគោ​ស្រស់​នេះទើប តែបានផ្លាស់ប្តូរ​ទី​តាំង​ពីក្រុង​តាខ្មៅ មកកាន់​តំបន់​អរិយក្សត្រ​នេះ បាន​ប្រហែល​៧ខែ​ប៉ុណ្ណោះ ដោយសារតែ​​ទីតាំង​​ចាស់​មាន​ទំហំ​តូចពេក ហើយទីតាំង​ថ្មីនេះ មានទំហំ​ដល់​ទៅ​​៦ហិកតា។បើតាម​ការឲ្យ​ដឹង​ពីខេននី កសិដ្ឋាន​ផលិត​ទឹក​ដោះគោ​ស្រស់​នឹងបើក​សម្ភោធ​ជាផ្លូវការ​ក្នុងអំឡុង​ចុងខែ​មីនា គឺបន្ទាប់​កសិដ្ឋាន​នេះរៀប​ចំ​ហេដ្ឋារចនា​សម្ព័ន្ធរួចរាល់ ហើយ​លោកមាន​គម្រោង​នឹងពង្រីក​​កសិដ្ឋាន​បន្ថែមទៀត ដោយ​អាចនឹង​នាំចូល​គោ​រាប់ពាន់​​ ម៉ឺនក្បាល​បន្ថែម ដែលលោក​សង្ឃឹមថា កសិដ្ឋាន​នេះ​​អាចនឹងក្លាយ​ជាកសិដ្ឋាន ដែលផលិត​ទឹកដោះគោ​ស្រស់​ធំជាងគេ​ក្នុងតំបន់​អាស៊ីអាគ្នេយ៍ និងអាច​ផ្តល់​​ការ​ងារ​បានយ៉ាង​ដល់ពលរដ្ឋ​ខ្មែរ ក៏ដូចជា​ការលើក​ស្ទួយ​ផលិតផល​ក្នុងស្រុក​ថែម​ទៀតផង។​

កសិដ្ឋាន​ ម៉ូម៉ូ ហ្វាម មិនតែ​​បានរួមចំណែក​ក្នុងការ​​កាត់បន្ថយការ​នាំចូល​ទឹកដោះគោ​ស្រស់​ពី​ក្រៅ​ប្រទេស​ប៉ុណ្ណោះទេ ប៉ុន្ដែ ក៏បាន​រួមចំណែក​ក្នុងការ​កាត់ប​ន្ថយ​ការ​ចំណាក​ស្រុក​របស់​ពលរដ្ឋ​ផងដែរ តាមរយៈ​ផ្ដល់​នូវការ​ងារ និងបទពិសោធន៍​ល្អ​​សម្រាប់​​ប្រជាពលរដ្ឋ​។ជាក់ស្ដែង បុគ្គលិក​​​ផ្នែក​​​ដាក់ចំណី និងផ្នែក​យក​​ទឹកដោះគោ​​នៃកសិដ្ឋាន​ម៉ូម៉ូ ហ្វាម២​រូប បានឲ្យ​ដឹងដែរថា ការងារ​​នៅ​ទីនេះ​អាចផ្តល់​​ប្រាក់​ចំណូល​​ឲ្យ​ពួកគាត់​​បាន​សមរម្យ​ក្នុងការ​ផ្គត់ផ្គង់​​ជីវភាព​​ប្រចាំថ្ងៃ​បាន ដោយមិន​​ចាំបាច់​​ចំណាក​​ស្រុក​​ទៅ​ធ្វើការ​ស្រុក​គេ។

ក្រុមហ៊ុន​ផលិត​ទឹក​ដោះគោ​ធំ​មួយ​ទៀត គ្រោង​បង្កើត​កសិដ្ឋាន​​​គោ​ទឹកដោះ​នៅ​ឆ្នាំ​២០២០

ទើប​បើក​ដំណើរការ​បាន​ត្រឹម​តែ​ជាង​១​ឆ្នាំ​ប៉ុណ្ណោះ ក្រុមហ៊ុន​អង្គរ ឌែរី ប្រូដាក ខូអិលធីឌី ដែល​បាន​បោះទុន​ជាង​២០​លាន​ដុល្លារ បង្កើត​រោងចក្រ​ផលិត​ទឹក​ដោះ​គោ​នៅ​កម្ពុជា បាន​អះអាង​ថា ខ្លួន​គ្រោង​នឹង​បង្កើត​កសិដ្ឋាន​ចិញ្ចឹម​គោ​យក​ទឹក​ដោះ​​ទ្រង់ទ្រាយ​ធំ​មួយ ​នៅ​កម្ពុជា ខណៈ​ដែល​តម្រូវការ​ទីផ្សារ​កំពុង​មាន​ការ​កើន​ឡើង​ខ្លាំង។ នេះ​បើ​តាម​ការ​អះអាង​ពី​នាយក​ប្រតិបត្តិ​របស់​ក្រុមហ៊ុន​មួយ​នេះ។លោក Doan Quoc Khanh នាយក​ប្រតិបត្ដិ​ក្រុមហ៊ុន អង្គរ ឌែរី ប្រូដាក បាន​ប្រាប់ ខេមបូណូមីស ថា ដោយ​មើល​ឃើញ​ពី​តម្រូវការ​អ្នក​ប្រើ​ប្រាស់ ក៏​ដូចជា​អ្នក​និយម​ទទួល​ទាន​ទឹក​ដោះគោ​មាន​ការ​កើន​ឡើង​ជា​រៀង​រាល់​ឆ្នាំ ទើប​ក្រុមហ៊ុន​របស់​លោក គ្រោង​នឹង​បង្កើត​កសិដ្ឋាន​ចិញ្ចឹម​គោ​យក​ទឹកដោះ​នៅ​កម្ពុជា​នៅ​ឆ្នាំ​២០២០ ពោល​គឺ​នៅ​៣​ឆ្នាំ​ទៀត។

នាយក​ប្រតិបត្តិ​ក្រុមហ៊ុន​ផលិត​ទឹកដោះ​គោ​ដ៏​ធំ​​នៅ​កម្ពុជា​មួយ​នេះ​ បាន​លើក​ឡើង​ទៀត​ថា ក្រុមហ៊ុន​របស់​លោក​បាន​និង​កំពុង​សិក្សា​ពី​ទីផ្សារ ហើយ​ក៏​បាន​ទំនាក់​ទំនង​ជាមួយ​អង្គការ​ក្រៅ​រដ្ឋាភិបាល និង​ដៃគូ​ពាក់ព័ន្ធ​មួយ​ចំនួន​រួច​រាល់​ហើយ ក្នុង​ការ​សហការ​គ្នា​បង្កើត​កសិដ្ឋាន​ចិញ្ចឹម​គោ​ទឹក​ដោះ​នៅ​កម្ពុជា។

លោក Quoc Khanh បន្ត​ថា តាម​ការ​សង្កេត​មើល​ពី​ទីផ្សារ​ជាក់​ស្ដែង ឃើញថា ទំនោរ​នៃ​អ្នក​និយម​ទទួល​ទាន​ទឹក​ដោះ​គោ​មាន​ការ​កើន​ឡើង​យ៉ាង​ខ្លាំង ខណៈ​ដែល​សមត្ថភាព​ផលិត​របស់​ក្រុមហ៊ុន​លោក​បាន​កើន​ឡើង​ដល់ ១៥% និង​គ្រោង​ពង្រីក​បន្ថែម​ឲ្យ​បាន​១៥% ទៀត នៅ​ឆ្នាំ​ក្រោយ។ មិន​តែ​ប៉ុណ្ណោះ ក្រុមហ៊ុន​មួយ​នេះ ក៏​មាន​មហិច្ឆតា​ក្នុង​ការ​ផលិត​នាំចេញ​ទៅ​ទីផ្សារ​បរទេស​នៅ​ពេល​ឆាប់ៗ​ខាង​មុខ​នេះ​ផង​ដែរ ដូចជា ប្រទេស​វៀតណាម​និង​ថៃ ​ជាដើម។

សូម​បញ្ជាក់​ថា បច្ចុប្បន្ន រោងចក្រ​មួយ​នេះ​មាន​សមត្ថភាព​ផលិត​ផលិត​ផល​ជាង​១០​មុខ ដោយ​ក្នុង​មួយ​ឆ្នាំៗ អាច​ផលិត​ទឹកដោះ​គោ​ស្រស់​បាន​១៩​លាន​លីត្រ យ៉ាអ៊ួរ​ចំនួន​៦៤​លាន​កំប៉ុង និង​ទឹកដោះ​ខាប់​ចំនួន​៨០​លាន​កំប៉ុង ហើយ​ក្នុង​នោះ​វត្ថុធាតុ​ភាគ​ច្រើន​ត្រូវ​បាន​នាំ​ចូល​ពី​បរទេស ដូចជា អាមេរិក អឺរ៉ុប និង​ញូហ្សឺឡែន។គួររំឭកថា នៅ​កម្ពុជា ក៏​មាន​ក្រុមហ៊ុន​អាមេរិក​មួយ​ ដែល​មាន​ឈ្មោះ​ថា MOO MOO Farm បាន​មក​បោះ​ទុន​វិនិយោគ​​​ផលិត​ទឹក​ដោះ​គោ​ស្រស់​​ផង​ដែរ ដោយ​ក្រុមហ៊ុន​នេះ ចាប់​ផ្ដើម​ដំណើរការ​តាំង​ពប្រមាណ​ជាង ២​ឆ្នាំ​មុន​មក​ម្ល៉េះ។

ក្រុមហ៊ុន MOO MOO Farm នេះ បាន​អះអាង​ឲ្យ​ដឹងថា ខ្លួន​នាំ​ចូល​មេគោ​ចិញ្ចឹម​យក​ទឹក​ដោះ ពី​សហរដ្ឋ​អាមេរិក​ដោយ​ផ្ទាល់ និង​ផ្ដោត​លើ​ការ​ផលិត​ជា​ទឹក​ដោះគោ​ស្រស់ ដោយ​ក្នុង​មួយថ្ងៃៗ គេ​គ្រោង​ផលិត​ឲ្យ​បាន​ជាង ២០០លីត្រ។ កាល​ជួបសម្ភាស​ជាមួយ ខេមបូណូមីស នា​ដើម​ឆ្នាំ​២០១៧ ក្រុមហ៊ុន MOO MOO Farm មិន​បាន​បញ្ជាក់​ប្រាប់​ពី​ទុន​វិនិយោគ និងបច្ចេកទេស​ចិញ្ចឹម​ទេ ពីព្រោះ​ខ្លាច​មាន​គេ​លួច​ចម្លង។

គេ​នៅ​មិនទាន់ដឹង​ថា ក្រុមហ៊ុន​ទាំងពីរ​នេះ​នឹង​មាន​ការ​ប្រកួត​ប្រជែង​គ្នា​បែប​ណា​នោះទេ ប៉ុន្តែ បើ​មាន​ទំហំ សមត្ថភាព​ផលិត និង​មុខ​ផលិតផល​ដែល​នឹងផលិត ហាក់​មាន​ភាព​ខុសគ្នា​ឆ្ងាយ៕

ក្រុមហ៊ុន​អាមេរិក​ ផលិត​ទឹក​ដោះ​គោ​ស្រស់​ដំបូង​នៅ​កម្ពុជា សន្យា​ដណ្តើម​ទីផ្សារ​ទឹក​ដោះ​គោ​ស្រស់​នាំ​ចូល ក្រុមហ៊ុន​អាមេរិក​មួយ​ដែល​មាន​ឈ្មោះ​ថា MOO MOO Farm ដែល​​ផលិត​ទឹក​ដោះ​គោ​ស្រស់​លើក​ដំបូង​គេ​បង្អស់​នៅ​កម្ពុជា បាន​ឈាន​ជើង​ចូល​មក​បោះទុន​វិនិយោគ ផលិត និង​ផ្គត់ផ្គង់​ទឹក​ដោះ​គោ​ស្រស់​ក្នុង​ប្រទេស​កម្ពុជា ខណៈ​ដែល​ទីផ្សារ​ទឹក​ដោះ​គោ​ស្រស់​នៅ​ក្នុង​ស្រុក​ពឹង​ផ្អែក​ទាំង​ស្រុង​ទៅ​លើ​ការ​នាំចូល​ទឹក​ដោះ​គោ​ស្រស់​ពី​ក្រៅ​ប្រទេស។ក្រុមហ៊ុន​នេះ​បាន​ចាប់​ផ្តើម​វិនិយោគ​ការ​ផលិត​ទឹក​ដោះ​គោ​ស្រស់​កាល​ពី​ពីរ​ឆ្នាំ​មុន​ ដោយ​បាន​នាំ​ចូល​គោ​ផលិត​ទឹក​ដោះ​ពី​សហរដ្ឋ​អាមេរិក​ដើម្បី​មក​បន្សាំ​និង​ដើម្បី​ផលិត​ទឹកដោះ​នៅ​កម្ពុជា។

លោក Kenny Mattews ប្រធាន​នាយក​ប្រតិបត្តិ​នៃ​កសិដ្ឋាន MOO MOO Farm ដែល​ផ្គត់ផ្គង់​ទឹក​ដោះ​គោ​ស្រស់​ម៉ាក Moo Moo Cow បាន​ឲ្យ​ដឹង​ថា ដោយសារ​តែ​លោក​មើល​ឃើញ​ពី​ឱកាស​ល្អ​ក្នុង​ការ​វិនិយោគ រួមជាមួយ​នឹង​ទីផ្សារ​ធំ​ទូលាយ។

ម្យ៉ាង​វិញ​ទៀត ការ​ផលិត​ទឹក​ដោះ​គោ​ស្រស់​នេះ​មិន​ទាន់​មាន​វិនិយោគិន​ណា​សម្រេច​វិនិយោគ​នៅ​ឡើយ ទើប​ធ្វើ​ឲ្យ​លោក​សម្រេច​ចិត្ត​បោះទុន​វិនិយោគ​ក្នុង​មុខ​ជំនួញ​នេះ។ យ៉ាង​ណា​ក៏​ដោយ លោក​មិន​បាន​ប្រាប់​ពី​ទឹក​ប្រាក់​វិនិយោគ និង​បច្ចេកទេស​ចិញ្ចឹម​នោះ​ឡើយ ដោយ​ខ្លាច​មាន​អ្នក​ក្រោយ​លួច​ចម្លង​តាម។

លោក Kenny Mattews បន្ត​ថា ក្រុមហ៊ុន​របស់​លោក​បាន​នាំចូល​គោ​ផលិត​ទឹកដោះ​បន្តិច​ម្តងៗ ជាមួយ​នឹង​ការ​សិក្សា​ទីផ្សារ​ឲ្យ​បាន​កាន់​តែ​ច្បាស់​លាស់​ជៀសវាង​បរាជ័យ។ ក្រុមហ៊ុន​នេះ​សន្យា​ចូលរួម​ចំណែក​ប្រកួត​ប្រជែង​និង​កាត់​បន្ថយ​ការ​នាំចូល​ទឹក​ដោះ​គោ​ស្រស់​ពី​បរទេស។

ជំហាន​ដំបូង ការផ្គត់ផ្គង់​បាន​ជាង​​២០០លីត្រ​ក្នុង​មួយ​ថ្ងៃ

នាយក​ប្រតិបត្តិ​កសិដ្ឋាន​ចិញ្ចឹម​គោ​យក​​ទឹកដោះ​ស្រស់​រូប​នេះ បញ្ជាក់​បន្ថែម​ថា ដោយសារ​តែ​ក្រុមហ៊ុន​របស់​លោក​ផ្គត់ផ្គង់​ទឹកដោះ​គោ​ស្រស់​ដំបូង​គេ ដូច្នេះ អ្វី​ដែល​ក្រុមហ៊ុន​របស់​លោក​ត្រូវ​យក​ចិត្ត​ទុក​ដាក់​នោះ គឺ​សុខភាព​គោ បន្សាំ​គោ​ឲ្យ​សម្រប​នឹង​បរិយាកាស​នៅ​កម្ពុជា និង​ផ្គត់ផ្គង់​ទឹក​ដោះ​គោ​ស្រស់​ប្រកប​​ដោយ​ស្តង់ដារ​អនាម័យ​ខ្ពស់។ 

សព្វថ្ងៃ ក្រុមហ៊ុន​បាន​ចិញ្ចឹម​គោ​និង​ផ្គត់ផ្គង់​ទឹកដោះ​គោ​ស្រស់​បាន​ប្រមាណ​ជាង ២០០​លីត្រ​ ក្នុង​មួយ​ថ្ងៃ ដើម្បី​ផ្គត់ផ្គង់​ទៅ​តាម​ផ្សារ​ទំនើប​ធំៗ និង​តាម​ហាង​លក់​បន្លែ​សរីរាង្គ​មួយ​ចំនួន​នៅ​ក្នុង​រាជ​ធានី​ភ្នំពេញ ដែល​ក្នុង​មួយ​លីត្រ​តម្លៃ ២,៥​ដុល្លារ​អាមេរិក។

លោក ប៉ែន មីរ៉ាន់ដា ប្រធាន​សមាគម​អ្នក​ចិញ្ចឹម​គោ​យក​ទឹក​ដោះ​កម្ពុជា និង​អ្នក​ជំនាញ​វិទ្យាសាស្ត្រ​សត្វ បាន​បញ្ជាក់​ថា លោក​គាំទ្រ​ចំពោះ​កសិដ្ឋាន​ចិញ្ចឹម​គោ​យក​ទឹកដោះ​មួយ​នេះ ដែល​ជា​ការ​ចាប់​ផ្តើម​មួយ​ដ៏​ល្អ ​សម្រាប់​ទីផ្សារ​មួយ​នេះ។

លោក​អះអាង​ថា ទីផ្សារ​ទឹកដោះ​គោ​ស្រស់​នៅ​កម្ពុជា​ស្ទើរ​តែ​ទាំង​ស្រុង នាំចូល​មក​ពី​ក្រៅ​ប្រទេស។ បច្ចុប្បន្ន កម្ពុជា​មាន​អ្នក​ចិញ្ចឹម​គោ​យក​ទឹកដោះ​ជា​លក្ខណៈ​គ្រួសារ​តិចតួច​ណាស់ ហើយ​មាន​តែ​កសិដ្ឋាន​ចិញ្ចឹម​គោ ​យក​ទឹក​ដោះ MOO MOO Farm មួយ​ប៉ុណ្ណោះ។

កម្ពុជា​ត្រូវការ​ទឹក​ដោះគោ​ស្រស់​ប្រមាណ ៦ម៉ឺន​លីត្រ​ក្នុង​មួយ​ខែ

លោក​ មីរ៉ានដា បាន​ប៉ាន់​ប្រមាណ​ថា តម្រូវការ​ទីផ្សារ​ទឹកដោះ​គោ​ស្រស់​ជា​ប្រចាំ​មាន​ប្រមាណ ៥​ម៉ឺន​លីត្រ ទៅ ៦​ម៉ឺន​លីត្រ​ក្នុង​មួយ​ខែ។

លោក​បាន​បញ្ជាក់​ថា មាន​ក្រុមហ៊ុន​ធំៗ​មួយ​ចំនួន បាន​ធ្វើការ​វិនិយោគ​ក្នុង​ការ​ផលិត​ទឹកដោះ​គោ​ស្រស់​ផង​ដែរ ប៉ុន្តែ បាន​បរាជ័យ​ទៅ​វិញ ដោយសារ​តែ​កង្វះ​ខាត​ផ្នែក​បច្ចេកទេស ទាំង​ការ​ចិញ្ចឹម ចំណី ទឹក​ស្អាត ធនធាន​មនុស្ស​គ្មាន​បទ​ពិសោធន៍​គ្រប់​គ្រាន់ ខ្វះ​ការ​ស្រាវជ្រាវ​ទីផ្សារ ខ្វះ​ថវិកា និង​ទំនុក​ចិត្ត​ដើម្បី​វិនិយោគ​លើ​វិស័យ​នេះ។ ពិសេស​ជាង​នេះ​ទៅ​ទៀត តម្លៃ​ផលិត​កម្ម​ថ្លៃ​និង​ការ​ប្រកួត​ប្រជែង​ជាមួយ​ផលិត​ផល​ទឹក​ដោះ​គោ​ស្រស់​ដែល​នាំ​ចូល​ពី​បរទេស។

សូម​ជម្រាប​ដែរ​ថា ថ្មីៗ​នេះ សារព័ត៌មាន​អេឡិចត្រូនិច ខេមបូណូមិស បាន​ធ្វើការ​ចុះផ្សាយ​ថា ទីពិឃាត​គោ​អូស្រ្តាលី​ដ៏​ធំ​ជាង​គេ​មួយ​នៅ​ក្នុង​តំបន់​អាស៊ី​ ដែល​បាន​បោះទុន​វិនិយោគ​នៅ​កម្ពុជា​អស់​រយៈ​ពេល​ជាង ១​ឆ្នាំ​កន្លង​មក​នេះ កំពុង​ជួប​បញ្ហា​ប្រឈម​ទៅ​នឹង​ការ​ខ្វះខាត​ការ​សហការ​ពេញ​លេញ​ពី​បណ្តា​ក្រសួង​ពាក់ព័ន្ធ។ 🐂 ទីសត្តឃាត​គោ​អូស្ត្រាលី​លំដាប់​អន្តរជាតិ​តែ​មួយ​គត់នៅ​កម្ពុជា​ប្រឈម​នឹង​ការ​ក្ស័យ​ធន

ទន្ទឹម​នឹង​នេះ​ដែរ ទីសត្តឃាដ​គោ​អូស្ត្រាលី​ដ៏​ធំ​មួយ​នេះ ក៏​ជួប​បញ្ហា​​ការ​​ពុំ​មាន​ការ​បញ្ជា​ទិញ​ពី​បណ្តា​ប្រទេស​​គោលដៅ​​ដែល​​ត្រូវ​នាំ​ចេញ​​ទៅ ដោយសារ​​ពុំ​មាន​ការ​គាំទ្រ​ពី​ភ្នាក់ងារ​អនាម័យ​និង​ភូតគាម​អនាម័យ​នៃ​បណ្តា​ប្រទេស​ទាំងនោះ ដែល​ពេល​នេះ​ទាមទារ​ឲ្យ​ក្រសួង​ពាក់ព័ន្ធ​ត្រូវ​ជួយ​អន្តរាគមន៍​ជា​បន្ទាន់។ នេះ​បើ​យោង​តាមរយៈ​ការ​វាយ​តម្លៃ​ក្នុង​ដំណើរ​ចុះ​ត្រួត​ពិនិត្យ​របស់​ឯកឧត្តម វេង សាខុន រដ្ឋមន្ត្រី​និង​ថ្នាក់​ដឹកនាំ​ក្រសួង​កសិកម្ម រុក្ខា​ប្រមាញ់ និង​នេសាទ បាន​ចុះ​ពិនិត្យ​កាល​ពី​ថ្ងៃ​ទី​២៣ ខែ​មីនា ឆ្នាំ២០១៧។ 

បច្ចុប្បន្ន​មាន​តែ​ក្រុមហ៊ុន MOO MOO Farm មួយ​ទេ ដែល​អាច​ឈរ​ជើង​ប្រតិបត្តិការ​ផលិត​ទឹកដោះ​គោ​ស្រស់​ដើម្បី​ផ្គត់ផ្គង់​លើ​ទីផ្សារ​នៅ​កម្ពុជា​បាន។ ហើយ​ក្រុមហ៊ុន​អាមេរិក​មួយ​នេះ​សន្យា​ថា នឹង​ធ្វើការ​ប្រកួត​ប្រជែង និង​កាត់​បន្ថយ​ការ​នាំចូល​ទឹក​ដោះ​គោ​ស្រស់​ពី​ក្រៅ​ប្រទេស ដោយ​ពង្រឹង​ទៅ​លើ​គុណភាព​ផលិត តម្លៃ និង​សោភ័ណ​ភាព៕

កសិដ្ឋានចិញ្ចឹមគោយកទឹកដោះ និងរោងចក្រកែច្នៃ តម្លៃ១០លានដុល្លារ នៅខេត្តតាកែវ ត្រូវបាន CDC អនុម័ត ក្រុមប្រឹក្សាអភិវឌ្ឍន៍កម្ពុជា ហៅកាត់ CDC កាលពីពេលថ្មីៗនេះ បានអនុម័តគម្រោងកសិដ្ឋានចិញ្ចឹមគោយកទឹកដោះ និងរោងចក្រកែច្នៃ ដែលមានតម្លៃវិនិយោគប្រមាណ ១០ លានដុល្លារអាមេរិក។ គម្រោងនេះ ត្រូវបានអ្នកជំនាញមើលឃើញថា គឺធ្វើឡើងស្របទៅតាមតម្រូវការទីផ្សារទឹកដោះគោស្រស់នៅកម្ពុជានាពេលបច្ចុប្បន្នកំពុងមានសន្ទុះកើនឡើង។បើតាម ក្រុមប្រឹក្សា​អភិវឌ្ឍន៍កម្ពុជា គម្រោងបង្កើត​កសិដ្ឋាន​ចិញ្ចឹម​គោ យកទឹកដោះ និងរោងចក្រ​កែច្នៃ ដែល​ត្រូវបាន​អនុម័តនេះ គឺជារបស់​ KHMER FRESH MILK CO.,LTD. ដែលមាន​ទីតាំង​វិនិយោគ​ស្ថិត​នៅភូមិ​ឧកាសាំង ឃុំកណ្តឹង ស្រុកបាទី ខេត្តតាកែវ មានទុន​វិនិយោគ ១០លានដុល្លារអាមេរិក និងអាច​បង្កើត​ការងារ​បាន​ចំនួន ៣៧កន្លែង។

ខេមបូណូមីស នៅមិនទាន់​អាច​ទំនាក់​ទំនង​ជាមួយនឹង​អ្នកគ្រប់គ្រង​កសិដ្ឋាន​នេះ​បាននៅ​ឡើយទេ។ លោក បណ្ឌិត សំ ហេង អគ្គនាយក​ក្រុមហ៊ុន​នាំចូល​ម្សៅ​ទឹកដោះគោ​កូនក្មេង Hero Baby ពីប្រទេស​ស្វីស បាន​ប្រាប់​ខេមបូណូមីសថា ក្នុងនាម​លោក​ជា​ពាណិជ្ជករ​រកស៊ី​ក្នុង​វិស័យ​នេះ លោកពិត​ជា​រីករាយ និងស្វាគមន៍​ចំពោះ​វត្តមាន​របស់​កសិដ្ឋាន​ចិញ្ចឹម​គោយកទឹកដោះ និង​រោងចក្រ​កែច្នៃ​ដែលមាន​បច្ចេកទេស​ខ្ពស់​នៅកម្ពុជា។ លោកបន្ថែមថា បច្ចុប្បន្ន ទីផ្សារ​ទឹកដោះគោស្រស់​កំពុង​មានតម្រូវការ​ច្រើន​គួរឲ្យកត់​សម្គាល់ ហើយកម្ពុជា​ក៏ត្រូវការ​ផលិតផលនេះ កាន់តែច្រើន​ថែមទៀត ព្រោះវា​ជាប្រភេទ​អាហារ​មួយ​ជួយ​បំប៉ន​សុខភាព​មនុស្ស ពិសេស គឺការលូតលាស់​ឆ្អឹងរឹងមាំតែម្ដង។ បច្ចុប្បន្ន ការចិញ្ចឹមគោ​យកទឹកដោះ ក៏មាន​កសិដ្ឋាន​មួយកន្លែង​នៅកម្ពុជា​កំពុង​ប្រតិបត្តិការអាជីវកម្ម​របស់ខ្លួន ដែលមានសត្វគោ​ប្រមាណ ២០០ ក្បាល និងគ្រោងពង្រីកការ​ចិញ្ចឹម​រហូតដល់ ជាង ១ពាន់​ក្បាល​នៅពេលអនាគត។ មានចំងាយ​​ប្រមាណ​​ជិត៤​គីឡូម៉ែត​ពីរាជធានីភ្នំពេញ ដោយត្រូវធ្វើ​ឆ្លងកាត់​កំពង់​ចម្លង​ភ្នំពេញ-អរិយក្សត្រ កសិដ្ឋាន​ផលិត​ទឹកដោះគោ​ស្រស់​ម៉ូម៉ូហ្វាម (MOMO FARM) មានទីតាំង​ស្ថិតនៅ​ក្នុងភូមិ​អរិយក្សត្រ ឃុំអរិយក្សត្រ​ ស្រុកល្វាឯម ខេត្តកណ្តាល។ កសិដ្ឋាននេះ បាន​បង្កើតឡើង​៣ឆ្នាំមកហើយ ដោយចាប់ផ្ដើមឡើង​ជាមួយការចិញ្ចឹម​សត្វគោទឹកដោះ​ចំនួន តែ១០ក្បាល ប៉ុណ្ណោះ។ លោកបណ្ឌិត សំ ហេង បាន​គូសបញ្ជាក់ថា ជាទូទៅ​ផលិត​ទឹកដោះ​គោស្រស់ គឺពុំសូវជា​ទាមទារ​បច្ចេកទេស​ខ្ពស់ ដូចការ​ផលិត​ម្សៅទឹកដោះគោ​សម្រាប់​កូនក្មេង​នោះទេ ពោលគឺ ការផលិត​ទឹកដោះគោ​ស្រស់ គឺគ្រាន់តែ​យកទឹកដោះ​ចេញ​ពីសត្វគោ​រួចយកមក​សម្លាប់មេរោគ និងមានការឆ្លង​កាត់​ការត្រួតពិនិត្យ​គុណភាព និងអនាម័យ​ពីក្រសួង​សុខាភិបាល​ត្រឹមត្រូវ គឺអាច​លក់បាន​នៅលើទីផ្សារ​ហើយ។

បើនិយាយពី ទីផ្សារ​ទឹកដោះគោ គេសង្កេតឃើញថា ម្យៅទឹកដោះគោ កូនក្មេង គឺមាន​ទីផ្សារធំជាង​ទឹកដោះគោ​ស្រស់​ទៅទៀត ខណៈដែល​ផលិតផលនេះ គឺ​ត្រូវបាននាំចូល​ទាំងស្រុង​ពីក្រៅប្រទេស។

កសិដ្ឋាន​ផលិត​ទឹកដោះគោ​ខេត្តព្រះវិហារ នឹង​ដំណើរការ​ចុងឆ្នាំ​នេះរាជធានី​ភ្នំពេញ ៖ ក្រុមហ៊ុន​មួយ​គ្រោង​នឹង​បើក​កសិដ្ឋាន​ផលិត​ទឹកដោះគោ និង​វេច​ខ្ចប់​យក​មក​លក់​ក្នុង​ទីផ្សារ​កម្ពុជា ដែល​អាច​នឹង​ដំណើរការ​នៅ​អំឡុង​ខែធ្នូ​ឆ្នាំ​២០១៨​នេះ ។លោក​បណ្ឌិត សុខ ទូច ប្រធាន​រាជបណ្ឌិត្យសភាកម្ពុជា​បាន​មាន​ប្រសាសន៍​ថា ក្រុមហ៊ុន​មួយ​បាន​មក​សហការ​ជាមួយ​លោក គ្រោង​ដឹក​ជញ្ជូន​គោ​ញី​ជា​ពូជ​ដា​ណា​ម៉ាក (Danamark) មក​ពី​ប្រទេស​ថៃ​ចំនួន​២០០​ក្បាល​មក​សាកល្បង​ចិញ្ចឹម​នៅ​ក្នុង​កសិដ្ឋាន ស្ថិត​នៅ​ស្រុក​ឆែប ខេត្តព្រះវិហារ ដើម្បី​ផលិត​ទឹកដោះ​សម្រាប់​វេច​ខ្ចប់​ផ្គត់ផ្គង់​ទីផ្សារ​ក្នុងស្រុក ។ លោក​បណ្ឌិត​បន្ត​ថា ការ​នាំ​យក​ពូជ​គោ​ញី​មក​ដាក់​ក្នុង​កសិដ្ឋាន​នោះ គឺ​អាច​នៅ​ក្នុង​អំឡុង​ខែធ្នូ​ឆ្នាំ​២០១៨​នេះ ដោយ​រង់​ចាំតែ​ ការ​ដាំ​ស្មៅ​ ឲ្យ​វា​ស៊ី​គ្រប់គ្រាន់​ប៉ុណ្ណោះ ។

លោក​បណ្ឌិត សុខ ទូច បន្ដ​ថា ៖« ក្រុមហ៊ុន​ផលិត​ទឹកដោះគោ​នៅ​ខេត្តព្រះវិហារ​នេះ គ្រោង​ចំណាយ​ប្រាក់​វិនិយោគ​ប្រមាណ​២,៥​លាន​ដុល្លារ​អា​មេ​រិ​ក ក្នុង​ការ​ទិញ​មេគោ និង​Sperm របស់​គោបា យក​មក​បង្កាត់​ពូជ​ក្នុងស្រុក ព្រមទាំង​ទិញ​ម៉ាស៊ីន​សម្រាប់​វេច​ខ្ចប់​ផលិតផល​ទឹកដោះគោ ដែល​ចេញពី​កសិដ្ឋាន​បញ្ជូន​មក​លក់​តាម​ទីផ្សារ » ។ លោក​អះអាង​ថា ប្រសិនបើ​ការ​សាកល្បង​លើ​មេគោ​ចំនួន ​២០០​ក្បាល​នេះ​ទទួល​បាន​ជោគជ័យ ជំហាន​បន្ដ​ក្រុមហ៊ុន​មាន​គម្រោង​បង្កើត​ធនាគារ​គោ ដោយ​បង្កាត់​ពូជ​និង​ទិញ​មេគោ​ជា​ច្រើន​មក​ប្រវាស់​ឱ្យ​ប្រជាពលរដ្ឋ​នៅ​តំបន់​ជុំវិញ​ជា​អ្នក​ចិញ្ចឹម រីឯ​ក្រុមហ៊ុន​ជា​អ្នក​ដើរ​ប្រមូល​ទិញ​ទឹកដោះគោ​ស្រស់​ពី​កសិករ ហើយ​វេច​ខ្ចប់​សម្រាប់​នាំ​យក​ទៅ​លក់​នៅ​ទីផ្សារ​បន្ត ។លោក​បណ្ឌិត ពន្យល់​ថា ៖« ក្នុង​មេគោ​១​ក្បាល បើ​ផ្ដល់​ចំណី​ឱ្យ​វា​បាន​ត្រឹមត្រូវ គឺ​វា​អាច​ផ្ដល់​ទឹកដោះ​បាន​ពី​២០​ ទៅ​៣០​លី​ត្ រ​ក្នុង​១​ថ្ងៃ ហើយ​ប្រសិនបើ​កសិករ​១​គ្រួសារ អាច​ចិញ្ចឹម​គោ​បាន​១០​ក្បាល គឺ​អាច​រក​ចំណូល​បាន​ប្រមាណ​ជា​១០០​ដុល្លារ​អា​មេ​រិ​ក ក្នុង​១​ថ្ងៃ​ៗ ពីព្រោះ​ក្រុមហ៊ុន​អាច​ទទួល​ទិញ​ទឹកដោះគោឆៅ ថ្លៃ​ប្រមាណ ​២.០០០​រៀល ក្នុង​១​លី​ត្រ »​។

លោក​បណ្ឌិត​បញ្ជាក់​ថា ប្រសិនបើ​គម្រោង​ចិញ្ចឹម​មេគោ​យក​ទឹកដោះ​នៅ​ខេត្តព្រះវិហារ​បាន​ទទួល​ជោគជ័យ​នោះ គឺ​វា​ជា​ជ្រុង​មួយ​ដែល​ជួយ​លើកកម្ពស់​ជីវភាព​ប្រជាពលរដ្ឋ ស្រប​តាម​គោលនយោបាយ​របស់​រាជរដ្ឋាភិបាល ដែល​បាន​កំណត់​នៅ​ឆ្នាំ​២០៣០​ខាង​មុខ ប្រទេស​កម្ពុជា​នឹង​ទទួល​បាន​ចំណូល​មធ្យម​កម្រិតខ្ពស់ ៕

អត្ថបទកសិដ្ឋានចិញ្ចឹមគោ យកទឹកដោះ ទំនើបបំផុត នៅកម្ពុជា ចាប់ផ្ដើមផលិតកម្មរបស់ខ្លួន ទោះបីជាប្រឈម បញ្ហាកូវីដ-១៩ ក៏ដោយភ្នំពេញ៖ ទោះបីជាអាជីវកម្ម និងវិនិយោគ​ នៅកម្ពុជាខ្លះ ប្រឈមនឹងបញ្ហាវីរុស កូវីដ-១៩ក៏ដោយ ក៏ក្រុមហ៊ុនក្នុងស្រុកមួយចំនួន នៅតែបន្តចំណាយពេលវេលា និដងធនធានរបស់ខ្លួន ទៅលើគម្រោងអាជីវកម្ម ដែលខ្លួនបានគ្រោងទុក មុនពេលមាន ការផ្ទុះឡើង នៃវីរុសនេះដូចជា គម្រោងអាជីវកម្ម របស់កសិដ្ឋានគិរីសួគ៌ (Kirisu Farm) ដែលជាកសិដ្ឋាន ចិញ្ចឹមគោ យកទឹកដោះ និងជារោងចក្រកែច្នៃទឹកដោះគោ ដែលប្រើបច្ចេកវិទ្យាទំនើបថ្មី ចុងក្រោយគេបង្អស់ ក្នុងខេត្តតាកែវ ដែលបានឆ្លងកាត់ ការអភិវឌ្ឍន៍ អស់រយៈពេល ជាច្រើនឆ្នាំមកហើយ។ កសិដ្ឋានមានផែនការពន្លឿន សកម្មភាពផលិតនាដើមឆ្នាំ ២០២០ ក្នុងគោលដៅផ្គត់ផ្គង់ទឹកដោះគោ សុទ្ធបំផុតពីធម្មជាតិ សម្រាប់ពលរដ្ឋកម្ពុជា ឲ្យបាននៅចុងឆ្នាំនេះ។

ឈរនៅក្បែរ សត្វគោញីផើម ប្រភេទ Holstein heifers ចំនួន ៥៥០ ក្បាល ដែលបាននាំចូល ពីប្រទេសអូស្រ្តាលី កាលពីខែ កុម្ភៈ មិនា និង មេសាកន្លងមក លោក ឈរ រិទ្ធី នាយកប្រតិបត្តិ ក្រុមហ៊ុន Khmer Fresh Milk Co., Ltd. និង ជាប្រតិបត្តិករ កសិដ្ឋាននេះ បានពន្យល់ថា «យើងពិតជាសប្បាយចិត្តណាស់ ដែលបាននាំចូល សត្វគោ លំដាប់ពិភពលោក ប្រភេទ Holstein heifers ចំនួន ៥៥០ក្បាល មកកម្ពុជាពីអូស្រ្តាលី។ បើគិតមកដល់ពេលនេះ គោដែលយើងបាននាំចូល បានបន្សុំាខ្លួន បានយ៉ាងល្អទៅ នឹងបរិយាកាសថ្មី ហើយមានសុខភាពល្អ នៅក្នុងកសិដ្ឋានរបស់យើង ដែលបានសាងសង់ តាមបច្ចេកវិទ្យាទំនើប»

លោក រិទ្ធី បានបន្ថែមទៀតថា “យើងសូមថ្លែងអំណរគុណ ដល់រាជរដ្ឋាភិបាលកម្ពុជា ដែលបានបង្កលក្ខណៈងាយស្រួល សម្រាប់យើងក្នុងការ នាំចូលសត្វគោទាំងអស់ ចូលមកកម្ពុជា។ ដោយសារបញ្ហាកូវីដ-១៩ យើងបានជួបប្រទះ ភាពស្មុគស្មាញមួយចំនួន នៅពេលដែលក្រុមអ្នកជំនាញ ផ្នែកដំាដុះ និងអ្នកជំនាញ ផ្នែកបច្ចេកវិទ្យា អន្តរជាតិកំពូលៗ ចូលមកប្រទេសកម្ពុជា។ យើងក៏សូមអរគុណដល់ រាជរដ្ឋាភិបាល ដែលបានសម្រួល ការផ្ដល់ទិដ្ឋាការ ដល់ក្រុមការងារ អន្តរជាតិរបស់យើង។ យើងសប្បាយចិត្តណាស់ ដែលការងាររបស់យើង នៅតែសម្រេចបានតាមផែនការ ហើយពិតជាមានមោទនភាព ដែលយើងអាចសម្រេចការងារ ស្ទើរតែទាំងស្រុង ទៅតាមផែនការ ដែលយើងបានគ្រោងទុក មុនពេលមានកូវីដ-១៩។”

កសិដ្ឋានទំហំ ៣០០ ហិចតានេះ មានទីតាំងស្ថិតនៅ ជ្រលងភ្នំតាម៉ៅ នៅខេត្តតាកែវ ចម្ងាយជាង ៣០ គីឡូម៉ែត្រ ពីភាគខាងត្បូង រាជធានីភ្នំពេញ។

កសិដ្ឋាននេះ មានខ្យល់អាកាស បរិសុទ្ធ ដីសំបូរជីវជាតិ និងភាពស្ងប់ស្ងាត់ល្អ ដែលអំណោយផល ដល់ការចិញ្ចឹមគោ ដែលបាននាំចូលថ្មី ទាំងអស់នោះ។ គោទាំងនេះស៊ី ពោត សណ្ដែក និងស្មៅប្រភេទផ្សេងៗ ដូចជាស្តៃឡូ (Stylo) មូមបាសា (Mombasa) ដែលដំា និងកែច្នៃ ដោយកសិដ្ឋាន ផ្ទាល់តែម្តង។

ក្រុមហ៊ុន Khmer Fresh Milk បានកកើតចេញ ពីការចាប់ដៃគូរវាង Cambodia-Laos-Myanmar Development Fund II ដែលមានមូលដ្ឋាន នៅប្រទេសសិង្ហបុរី តំណាងដោយក្រុមហ៊ុន Emerging Markets Investment Advisers (EMIA), មូលនិធិ Nexasia របស់ជប៉ុន ដែលមានមូលដ្ឋាន នៅប្រទេសសិង្ហបុរី និង ក្រុមស្ថាបនិក ដែលទទួលបាន ជោគជ័យខ្ពស់ រួមមាន សហគ្រិនកម្ពុជា និងសហគ្រិន មកពីប្រទេស អ៊ីស្រាអែល។

ដៃគូផ្នែកបច្ចេកវិទ្យា គឺក្រុមហ៊ុន Afimilk របស់ប្រទេសអ៊ីស្រាអែល។ Afimilk ជាក្រុមហ៊ុន មួយក្នុងចំណោម ក្រុមហ៊ុនផ្គត់ផ្គង់ធំបំផុត ខាងបច្ចេកវិទ្យា និងគ្រប់គ្រង​ កសិដ្ឋានគោទឹកដោះ នៅលើពិភពលោក។

ក្រុមហ៊ុន Afimilk បានទទួលជោគជ័យ ជាច្រើនមកហើយ ក្នុងការបង្កើត និងគ្រប់គ្រងគម្រោង អាជីវកម្មស្រដៀង គ្នានេះនៅទូទាំងពិភពលោក ក៏ដូចជាគម្រោងនៅប្រទេស វៀតណាម បង់ក្លាដែស និង ចិន។

ក្រុមហ៊ុននេះ ប្រើប្រាស់បច្ចេកវិទ្យាទំនើប ចុងក្រោយបំផុត និងគោលការណ៍ ការពារបរិស្ថាន ដើម្បីធានាថា កសិដ្ឋានរបស់ខ្លួន ដំណើរការប្រកបដោយចីរភាព និងផលិតផល ទឹកដោះគោរបស់ខ្លួន ត្រូវបានផលិតឡើង ស្របទៅតាមស្តង់ដារ អន្តរជាតិខ្ពស់បំផុត ដើម្បីធានាទំាងអនាម័យ និងគុណភាពផលិតផល។

លោក ជី សិលា ដៃគូសហស្ថាបនិក ក្រុមហ៊ុន Khmer Fresh Milk បានឲ្យដឹងថា ទោះបីមានការព្រួយបារម្ភ អំពីផលប៉ះពាល់ នៃវីរសុកូវីដ-១៩ ទៅលើសុខភាព និងវិបុលភាព នៅប្រទេសកម្ពុជាក៏ដោយ ក៏ក្រុមការងារកសិដ្ឋាននេះ មិនដែលគិតចង់ពន្យារពេល បើកដំណើរគម្រោង អាជីវកម្មនេះឡើយ សូម្បីតែម្ដង ហើយការបង្កើតស្តង់ដារថ្មី សម្រាប់កសិកម្ម និងផ្ដល់អាហារូបត្ថម្ភ កាន់តែល្អ នៅកម្ពុជា។

លោក សិលា បានមានប្រសាសន៍ថា «កសិដ្ឋានគិរីសួគ៌ (Kirisu Farm) មានចក្ខុវិស័យយូរអង្វែង ក្នុងការនាំយកទឹកដោះគោ សុទ្ធពីធម្មជាតិ បច្ចេកទេសកសិកម្ម និងការកែច្នៃចំណីអាហារ លំដាប់ពិភពលោក មកកាន់កម្ពុជា ហើយយើងមិនគិត អំពីផលចំណេញមួយភ្លែតៗ នោះទេ។ យើងបាននាំយក បច្ចេកវិទ្យាទំនើបៗ ហើយយើងកំពុងធ្វើការជាមួយ អ្នកជំនាញកសិកម្ម ជនជាតិអ៊ីស្រាអែល លើផ្នែកចិញ្ចឹមគោយកទឹកដោះ និងផ្នែកដំាដុះល្បីៗ នៅលើពិភពលោក ដើម្បីជួយពួកយើង លើការដាំដុះ របៀបមើលថែរក្សា សុខភាពគោ និងកែច្នៃទឹកដោះគោ សុទ្ធពីធម្មជាតិ ១០០ ភាគរយ ពីកសិដ្ឋានគិរីសួគ៌ (Kirisu Farm) ឲ្យមានគុណភាព ខ្ពស់តាមស្ដង់ដារ អន្តរជាតិនេះ។»

បុគ្គលិកភាគច្រើន របស់កសិដ្ឋាននេះ គឺជាប្រជាពលរដ្ឋ ក្នុងមូលដ្ឋានផ្ទាល់តែម្ដង ហើយក្រុមហ៊ុនបានឲ្យដឹងថា ខ្លួននឹងចែកចាយទឹកដោះគោ សុទ្ធដោយឥតគិតថ្លៃ ពីកសិដ្ឋាននេះ ជូនដល់ក្រុមគ្រួសារ និងមន្ត្រីរាជការ ក្នុងមូលដ្ឋាន ដើម្បីចូលរួមជាជំនួយ ពីផលប៉ះពាល់នៃវិបត្តិ កូវីដ-១៩ និងដើម្បីជាការតបស្នង សងគុណចំពោះ ប្រជាពលរដ្ឋមូលដ្ឋាន ដែលបានគាំទ្រ ដល់កសិដ្ឋាននេះ។

លោក ជី សិលា បាននិយាយថា “សម្រាប់ខ្ញុំនេះ គឺជាសុភមង្គល និងជាក្ដីសង្ឈឹមមួយ ហើយខ្ញុំពិតជាចង់ឃើញ ស្នាមញញឹមរបស់ក្មេងៗ នៅពេលដែល ពួកគេ ភ្លក្សរសជាតិទឹកដោះគោ សុទ្ធជាលើកដំបូង។ ទឹកដោះគោនេះមានរសជាតិ ខុសពីទឹកដោះគោ ដែលមានលក់ នៅស្រុកខ្មែរយើងកន្លងមក។”

លោក សិលា បាននិយាយថា “យើងអោយគោទាំងនេះ ស៊ីចំណីអាហារ ដែលជាគ្រាប់ធញ្ញជាតិ ដែលដាំក្នុងស្រុក ដើម្បីបំប៉នបន្ថែម ទៅលើចំណី ដែលដាំនៅក្នុងកសិដ្ឋានផ្ទាល់ ហើយទឹកដោះគោនៅទីនេះ ត្រូវបានកែច្នៃ នៅឯរោងចក្រដ៏ទំនើប របស់យើង។ ដូច្នេះយើងអាចផលិតបាន នូវទឹកដោះគោសុទ្ធបំផុត ដែលប្រជាជនកម្ពុជា មិនធ្លាប់ បានភ្លក្សពីមុនមក ហើយយកវាទៅលក់ នៅភ្នំពេញ និងនៅទូទាំងប្រទេសតែម្ដង ដោយចំណាយពេល ត្រឹមតែ ប៉ុន្មានម៉ោងប៉ុណ្ណោះ។”

ផលិតផល ពីកសិដ្ឋានគិរីសួគ៌ (Kirisu) នឹងគ្រោងដាក់លក់ទឹកដោះសុទ្ធ ធម្មជាតិ និងយ៉ាអួរស្រស់របស់ខ្លួន នៅតាមផ្សារទំនើប មីនីម៉ាត ភោជនីយដ្ឋាន និងហាងកាហ្វេនានា នាពេលខ្លីខាងមុខនេះ៕

សមាគមអ្នកចិញ្ចឹមគោទឹកដោះកម្ពុជា Dairy Cow Raising Association of Cambodiaសេចក្តីជូនដំណឹងសមាគមអ្នកចិញ្ចឹមគោទឹកដោះកម្ពុជា បានចាត់តាំងអង្គការលេខដូចតទៅ ប្រធាន អនុប្រធាន ហេរញ្ញិក រដ្ឋបាល/សម្របសម្រួល បច្ចេកទេសផលិតកម្មគោទឹកដោះ បច្ចេកទេសផលិតកម្មនិងបសុព្យាបាល បច្ចេកទេសកែច្នៃទឹកដោះ ផ្នែកទីផ្សារ។ យើងខ្ញុំនឹងផ្តល់ព៌ត័មានពីពួកគេ ដើម្បីភាពងាយស្រួលទំនាក់ទំនងការងារ និងការចែករំលែកចំណេះដឹង។

តើលោកអ្នកចង់ស្គាល់ពួកគេទេ?

ខេត្តព្រះវិហារៈ ទោះបី​ជា​​កសិដ្ឋាន​ចិញ្ចឹម​គោ​ផលិត​​ទឹក​ដោះគោ​តេជោសែន​ឫស្សី​ត្រឹប​​ ​ ស្ថិត​នៅ​​​​ចម្ងាយ​​ផ្លូវ​ជាង ៣៦០​ គីឡូម៉ែត្រ​ ពី​រាជធានី​ភ្នំពេញ​មែន​ក្តី ក៏​ទឹក​ដោះគោ​​ស្រស់​ ​​ជា​ផលិតផល​ខ្មែរ​ពិត​ ​១០០ ​ភាគរយ​​មួយ​នេះ​ កំពុង​​ត្រូវ​​​បាន​​​​នាំ​ចែកចាយ​​ក្នុង​ស្រុក​​​​ជា​បណ្តើរៗ​​​​ ​និង​ថែម​ទាំង​​មាន​ពលរដ្ឋ​ខ្មែរ​ចាប់​​អារម្មណ៍​​​​ច្រើន​ទៀត​ផង​។

ទឹក​ដោះគោ​តេជោ​សែន​​ឫស្សី​​ត្រឹប​ គឺ​ជា​ផលិតផល​ខ្មែរ​​​សុទ្ធ​ ១០០ ​ភាគរយ នេះ​ត្រូវ​បាន​​​ផលិត​ពី​​កសិដ្ឋាន​មួយ​​កន្លែង​​​​ស្ថិត​នៅ​​ឃុំ​ឆែប ២ ស្រុក​ឆែប ​ខេត្ត​ព្រះវិហារ​​ ​ក្នុង​តំបន់​ឧទ្យាន​​ជាតិ​​​​​រាជ​បណ្ឌិត្យ​សភា​កម្ពុជា​​តេជោ​ឫស្សីត្រឹប​ នៅ​លើ​វិសាលភាព​ផ្ទៃ​ដី​កសិដ្ឋាន​សរុប​​​ ចំនួន ៧០ ហិកតា​។ ​

តំបន់​ឧទ្យាន​ជាតិ​​នេះ​​ ​មាន​សក្ដានុពល​​ធំ​សំខាន់ៗ​​ចំនួន ​២ គឺ​ធនធាន​​ធម្មជាតិ និង​វប្បធម៌ តាំង​ពី​បាន​​បង្កើត​​​​នៅ​​ឆ្នាំ ​២០១៤​​ មក​ ដែល​ជា​​គម្រោង​របស់​រាជ​​បណ្ឌិត្យ​សភា​កម្ពុជា​​។

ហើយ​​​កសិដ្ឋាន​ចិញ្ចឹម​គោ​រឹត​​​យក​ទឹក​ដោះ​ស្រស់ៗ​ គឺ​ជា​​ផ្នែក​មួយ​នៃ​​ការ​បង្កើត​ឲ្យ​មាន​ការងារ​ក្នុង​តំបន់​ និង​សេវាកម្ម​សាធារណៈ​​មួយ​របស់​រដ្ឋ​លើ​វិស័យ​​កសិកម្ម​​​នៅ​ក្នុង​ខេត្ត​ព្រះវិហារ​​ដំបូង​គេ​​។​លោក សូត្រ សំណាង ដែល​ជា​​ប្រធាន​​កសិដ្ឋាន​នៃ​តំបន់​ឧទ្យានជាតិ​​រាជ​បណ្ឌិត្យ​សភា​កម្ពុជា​​​តេជោ​ឫស្សី​ត្រឹប ឲ្យ​ដឹង​​ថា​៖ «បើ​​តាម​​គម្រោង ​១០ ឆ្នាំ នៃ​ការ​បង្កើត​កសិដ្ឋាន​​​នៅ​លើ​​វិសាលភាព​ផ្ទៃ​ដី ៧០ ហិកតា គឺ​ត្រូវ​មាន​​ចិញ្ចឹម​មេ​​គោ​ចំនួន ២ ០០០ ក្បាល​។ ​ពេល​នេះ​ ​កសិដ្ឋាន​​​ បាន​អនុវត្ត​ជំហាន​​ដំបូង ​​នៅ​លើ​​​​វិសាលភាព​ផ្ទៃដី​ ៣២ ហិកតា​ ​ដំណើរ​បាន​​ ១​ ឆ្នាំ​ កន្លះ​​មក​ហើយ ដែល​​បង្កើត​ជា​​កសិដ្ឋាន​ចិញ្ចឹម​​គោ​ ដើម្បី​​ទាញ​យក​​ទឹក​ដោះ​ស្រស់ៗ​ និង​​មាន​បុគ្គលិក​ធ្វើ​ការ​​​នៅ​កសិដ្ឋាន​​ចំនួន​​​ប្រមាណ​ ៣០ នាក់​»។​

លោក សូត្រ សំណាង បន្ត​ថា​៖ «គម្រោង​នេះ​ដែរ​ក៏​​ជា​គំនិត​​​​​ផ្តួច​​ផ្តើម​របស់​លោក​​ បណ្ឌិត សុខ ទូច ​​ជា​ប្រធាន​រាជ​បណ្ឌិត្យ​​​សភា​កម្ពុជា​ ​​ដឹកនាំ​ដោយ​មាន​ការ​គាំទ្រ​ពី​រាជ​​រដ្ឋាភិបាល​​កម្ពុជា​​​។​​ ​ដំបូង​នេះ​​ដែរ​យើង​​មាន​មេ​គោ​​ផើម ដែល​អាច​​​រឹត​យក​ទឹក​​​ដោះ​ស្រស់ៗ​ចំនួន ​១០០ គោ​​ គឺ​​ទទួល​​​ថវិកា​ឧបត្ថម្ភ​ពី​​​សម្តេច ហ៊ុន សែន និង​​សម្តេច​គតិ​ព្រឹទ្ធ​បណ្ឌិត ចំនួន​ ១០ ម៉ឺន​ដុល្លារ​ផង​​​​ដែរ​​ ក្នុង​​​ការ​រៀបចំ​​កសិដ្ឋាន​​​នេះ​ឡើង។ មេគោ​​ ១០០ ​ក្បាល​នោះ ​ទិញ​​​មក​​ពី​ខេត្ត​ស្រះ​​កែវ​ ប្រទេស​ ​ថៃ​ ហើយ​​​​​ក៏​​​​កើត​កូន បាន​ ២០ ក្បាល​ផង​​ដែរ​​​»។ ​

បច្ចុប្បន្ន​កសិដ្ឋាន​ចិញ្ចឹម​គោ​​ និង​​​ផលិត​ទឹក​ដោះ​គោ​ស្រស់​តេជោ​​សែន​ឫស្សី​ត្រឹប ក៏​មាន​រោង​​​​រឹត​ទឹក​ដោះ​​គោ ១ និង​រោង​​​សម្រាប់​រម្ងាប់​មេរោគ​​​ទឹក​គោ​ ១ ក្នុង​​​ដំណើរ​ផលិត​ទឹក​ដោះគោ​ស្រស់​ យក​ទៅ​​​​ចែកចាយ​​​​តាម​តំបន់​ក្នុង​ស្រុក​​​នៅ​​ខេត្ត​ព្រះវិហារ និង​​រាជធានី​ភ្នំពេញ​។

លោក សំណាង បញ្ជាក់​​​ថា​៖ ​«​យើង​នៅ​មិន​ទាន់​ប្រើ​​​​ម៉ាស៊ីន​​រឹត​​ទឹក​ដោះគោ​​ ដោយ​ស្វ័យ​ប្រវត្តិ​​នៅ​ឡើយ​ទេ​ គឺ​​គ្រាន់​តែ​ប្រើ​ម៉ាស៊ីន​​រឹត​ពាក់​កណ្តាល​​ស្វ័យ​​ប្រវត្តិ​ប៉ុណ្ណោះ​​។ ​ក្នុង​ ​១​ ថ្ងៃ​​​​អាច​​រឹត​ទឹក​ដោះ​គោ​ស្រស់​ ​​​ត្រឹម​ ​២០០ លីត្រ​ប៉ុណ្ណោះ»​។​ ​លោក​ សូត្រ សំណាង ក៏​បាន​​​​​លើក​ឡើង​​ពី​ពេល​អនាគត​សម្រាប់​ការ​បង្កើត​ការងារ​ដល់​ពលរដ្ឋ​នៅ​ក្នុង​តំបន់​កសិដ្ឋាន​ចិញ្ចឹម​គោ​នេះ​ថា៖ «ម្យ៉ាង​​វិញ​ទៀត​ខាង​កសិដ្ឋាន​ចិញ្ចឹម​គោ​យក​​​ទឹក​ដោះគោ​ស្រស់ ដែល​​ផលិត​​​នៅ​ខេត្ត​ព្រះវិហារ​​​ នេះ ប្រសិន​បើ​ដំណើរ​ទៅ​​​​ជោគជ័យ​តាម​​គោលដៅ​​នោះ គឺ​យើង​នឹង​ផ្ទេរ​​​ការងារ​ទាំង​នេះ​ទៅ​​ដល់​ពលរដ្ឋ​ក្នុង​​សហគមន៍​​​ជា​អ្នក​កាន់​ការ​វិញ​​ គឺ​នៅ​ពេល​​យើង​អាច​​​បណ្តុះបណ្តាល​ពួក​គាត់​ឲ្យ​​ចេះ​វិធីសាស្រ្ត​ចិញ្ចឹម​គោ និង​​ ដាំ​ស្មៅ​តាម​បច្ចេកទេស​​​ សម្រាប់​​ជា​​អាហារ​សុខភាព​សត្វ​គោ​ និង​ចេះ​​ប្រើ​​បច្ចេកទេស​នានា​ ដែល​ពាក់ព័ន្ធ​នឹង​ចង្វាក់​ផលិតកម្ម​ទាញ​​​​យក​​​​​ទឹក​ដោះ​គោ​ស្រស់ៗ​បាន​​​។ ​នេះ​ក៏​ជា​​​ជំហាន​មួយ​នៃ​គោលដៅ​ធំ​នៃ​​​​ការ​សិក្សា​ស្រាវជ្រាវ និង​អនុវត្ត​ផង​ដែរ​​»។​

ខណៈ​​ទឹក​ដោះ​គោ​តេជោ​សែន​​ឫស្សី​ត្រឹប​ ត្រូវ​បាន​​នាំ​យក​ទៅ​ចែកចាយ​​ឥត​គិត​ថ្លៃ​ដល់​សិស្សានុសិស្ស នៅ​​តាម​សាលា​​​មួយ​ចំនួន ដល់​ពលរដ្ឋ​នៅ​តាម​តំបន់​ផ្សារ ប្រគេន​ព្រះ​សង្ឃ​​តាម​ទី​អារាម និង​បុគ្គលិក​មន្រ្តី​រាជ​ការ​មួយ​នៅ​​ក្នុង​ខេត្ត​ព្រះវិហារ​​ និង​ភ្នំពេញ​ ដើម្បី​​ភ្លក្ស​ពី​រសជាតិ​នៃ​ទឹក​ដោះ​គោ​ស្រស់ ​​ប្រមាណ​ ១ ៥០០ នាក់​ ដែល​ជា​​ផលិតផល​​ស្រុក​ខ្មែរ​នេះ។

សម្រាប់​ការ​លក់​​នៅ​លើ​ទីផ្សារ​​​វិញ ​​​អ្នក​ជាវ​យក​លក់​​បន្ត​​​នោះ ​គឺ​ខាង​​កសិដ្ឋាន​យើង​បាន​លក់​ជូន​​នៅ​ក្នុង​តម្លៃ ១ លីត្រ ៨ ០០០ រៀល ដោយ​យក​ចេញ​ពី​​ទីតាំង​​ចែកចាយ​ក្នុង​រាជ​ធានី​​​​ភ្នំពេញ​​នៅ​ឯ​​​រាជ​បណ្ឌិត្យ​សភា​កម្ពុជា​ ហើយ​​ប្រសិន​បើ​​បាន​ទៅ​​​​ដល់​ទីតាំង​​ផ្ទាល់​ នៅ​ក្នុង​ខេត្ត​​​​ព្រះវិហារ​នោះ​ គឺ​អាច​​នឹង​មាន​​តម្លៃ​ក្រោម​នេះ​៕​

ឆ្នាំ ២០១៤ អាជីវកម្ម​ផលិត​ទឹកដោះគោ​ស្រស់​នៅ​កម្ពុជា​កំពុង​តែ​ត្រដរ​ខ្យល់កាលពី​១៦​ឆ្នាំ​មុន លោក កែវ ស៊ុន អតីត​ជា​អ្នក​គ្រប់គ្រង​ផ្នែក​ប្រតិបត្តិការ​នៃ​រោងចក្រ​ផលិត​ទឹកដោះគោ​ក្នុង​ស្រុក​មួយ បាន​ផ្តួចផ្តើម​គម្រោង​នៃ​ការ​ចិញ្ចឹម​គោ​យក​ទឹកដោះ​នៅ​ភូមិ​កោះ​ក្របី សង្កាត់​ព្រែកថ្មី ខណ្ឌ​មានជ័យ​សម្រាប់​ក្រុមហ៊ុន Nestle។

គម្រោង​មួយ​នេះ​មាន​បំណង​ជំរុញ​ឲ្យ​កសិករ​ចាប់ផ្តើម​របរ​ចិញ្ចឹម​គោ​យក​ទឹកដោះ​ដោយ​បាន​ជួយ​បង្កាត់​គោទឹកដោះ ដោយ​សិប្បនិម្មិត​ជាមួយ​គោ​ក្នុង​ស្រុក​ដែល​កសិករ​កំពុង​ចិញ្ចឹម រួច​ផ្គត់ផ្គង់​មក​ឲ្យ​រោងចក្រ​វិញ។ នេះ​បើ​តាម​ការ​ឲ្យ​ដឹង​របស់​លោក កែវ ស៊ុន។

គម្រោង​មួយ​នេះ​ត្រូវ​បាន​ផ្តួចផ្តើម​ឡើង​នៅ​ឆ្នាំ​១៩៩៨ ដើម្បី​រំឭក​ឡើង​វិញ​នូវ​សម័យ​ដែល​កម្ពុជា​ផលិត​ទឹកដោះគោ​ហើយ​បាន​នាំចេញ​ទៅ​ក្រៅ​ប្រទេស​ក្នុង​អំឡុង​ទសវត្សរ៍​១៩៦០។

គម្រោង​នេះ​ត្រូវ​បាន​ប្រគល់​ឲ្យ​លោក​ដើម្បី​ធ្វើឲ្យ​បាន​ជោគជ័យ។

ដោយ​ធ្លាប់​ជា​បុគ្គលិក​នៃ​រោងចក្រ​ទឹកដោះគោ អប្សរា​ដែល​ជា​សហគ្រាស​របស់​រដ្ឋ​កាលពី​អំឡុង​ឆ្នាំ​១៩៦០។ លោក​បាន​ត្រឡប់​ចូល​ធ្វើការ​នៅ​រោងចក្រ​ទឹកដោះគោ អប្សរា​វិញ ក្រោយ​ពេល​របប ប៉ុល ពត បាន​បញ្ចប់​ទៅ។ រហូត​ដល់​ឆ្នាំ​១៩៩៨ នៅពេល​ដែល​ក្រុមហ៊ុន​Nestle បាន​ទិញ​រោងចក្រ អប្សរា លោក​កែវ ស៊ុន នៅ​រក្សា​តំណែង​នៅ​ទី​នោះ។លោក​ថ្លែង​ថា ការ​ជ្រើសរើស​យក​ភូមិ​កោះក្របី​ជា​ទីតាំង​ចិញ្ចឹម​គោ​ទឹកដោះ​នោះ​មិនមែន​ជា​ការ​ចៃដន្យ​នោះ​ទេ។ ក្នុង​បទសម្ភាស​ជាមួយ កម្ពុជា​ចុងសប្តាហ៍​កាលពី​ពេល​ថ្មីៗ​នេះ លោក កែវ ស៊ុន បច្ចុប្បន្ន​ជា​ប្រធាន​ស្តីទី​សមាគម​គោ​ទឹកដោះ​កម្ពុជា បាន​ឲ្យ​ដឹង​ថា ទីតាំង​ភូមិ​កោះក្របី​នេះ​មាន​ចម្ងាយ​ប្រមាណ​១០​គីឡូ​ប៉ុណ្ណោះ​ត្រូវ​បាន​ជ្រើសរើស​ជា​តំបន់​សម្រាប់​អនុវត្ត​គម្រោង​នេះ​ដោយ​ឆ្លងកាត់​ការ​សិក្សា​និង​ស្រាវជ្រាវ​ច្បាស់លាស់។

លោក​បាន​ថ្លែង​ថា៖ «កោះក្របី​នេះ​ធ្លាប់​ជា​ទីកន្លែង​ដែល​មាន​ប្រជាពលរដ្ឋ​ចិញ្ចឹម​គោ​យក​ទឹកដោះ ដើម្បី​ផ្គត់ផ្គង់​ដល់​រោងចក្រ​ផលិត​ទឹកដោះ​គោ​ក្នុង​សម័យ​សង្គម​រាស្ត្រនិយម​។

លោក កែវ ស៊ុន​បាន​រៀបរាប់ ដោយ​រំឭក​ពី​អតីតកាល​ថា កាលពី​ជំនាន់​នោះ​យើង​នាំ​ទឹកដោះគោ​ចេញ​ទៅ​ដល់​ហុងកុង​ឯណោះ ហើយ​ថៃ​និង​វៀតណាម​នៅ​មិន​ទាន់​ផលិត​បាន​ដូច​សព្វថ្ងៃ​ទេ។...តែ​ឥឡូវ​យើង​ដើរ​ក្រោយ​គេ ព្រោះ​ស្រុក​យើង​មាន​សង្គ្រាម​»។

នៅ​ឆ្នាំ​២០០០ លោក​ស៊ុន ប្រមូល​បាន​កសិករ​ចំនួន​ជាង​៣០​នាក់​ចូលរួម​។​នៅ​ឆ្នាំ​២០០១ គោ​ដែល​បង្កាត់​សិប្បនិម្មិត​បាន​រួចរាល់ ហើយ​គម្រោង​ដំណើរការ​ល្អ​រហូត​ដល់​ឆ្នាំ​២០០២ នៅពេល​ដែល​គ្រោះ​ទឹកជំនន់​កើតឡើង​។ លោក​រៀបរាប់​ថា៖ «ឆ្នាំ​២០០២ សំណាង​មិន​ល្អ ទឹកជំនន់​ខ្លាំង លិចលង់។ មិន​មាន​ស្មៅ​ជា​ចំណី​ឲ្យ​គោ​ស៊ី។​គោ​បង្កាត់​រួច​ហើយ​ដែល​កំពុង​ផើម​នោះ​មិន​មាន​ទីទួល​ខ្ពស់​ដេក​នៅ ខ្លះ​ក៏​ងាប់​អស់​ទៅ ប្រហែល​៦០​ភាគរយ​។ អ្នកស្រុក​ក៏​ឈប់​ចិញ្ចឹម នៅ​សល់​ខ្លះ​ក៏​បន្ត​ចិញ្ចឹម​ដែល​នៅ​ជា​សមាជិក​បច្ចុប្បន្ន​នេះ»។

ក្រុមហ៊ុន Nestle នៅ​ឆ្នាំ​នោះ​បាន​ប្រកាស​បិទ​ខ្សែ​ចង្វាក់​ផលតិកម្ម ដោយ​លើក​ឡើង​ពី​ការ​ប្រកួតប្រជែង​មិន​ស្មើភាព​ពី​ការ​នាំ​ចូល​គេច​ពន្ធ​ផលិតផល​ទឹកដោះគោ​ពី​ប្រទេស​ជិតខាង។ រោងចក្រ​នៅ​តែ​បន្ត​ការងារ​វេចខ្ចប់​របស់​ខ្លួន​ជាច្រើន​ឆ្នាំ​ក្រោយ​ទៀត។

ឆ្នាំ​២០០៣ លោក កែវ ស៊ុន បាន​ឈាន​ចូល​ដល់​វ័យ​ចូលនិវត្តន៍ ក្រុមហ៊ុន​បាន​ប្រគល់​គម្រោង​និង​ធនធាន​ក្នុង​គម្រោង​ទាំងអស់​ឲ្យ​លោក​ជា​ឯកជន។

ចាប់​តាំងពី​ចូលនិវត្តន៍ លោក​បន្ត​នៅ​ជា​អ្នក​ប្រឹក្សា​យោបល់​ដល់​កសិករ​ដែល​បន្ត​ចិញ្ចឹម​គោ​យក​ទឹកដោះ។ ការងារ​របស់​លោក​រួមមាន ការ​គាំទ្រ​ផ្នែក​បច្ចេកទេស​ចិញ្ចឹម បច្ចេកទេស​បង្កាត់​សិប្បនិម្មិត​បច្ចេកទេស​រឹត​យក​ទឹកដោះគោ​និង​ការ​រក្សា​អនាម័យ ហើយ​ក៏​ជា​អ្នក​រក​ទីផ្សារ​សម្រាប់​ទឹកដោះគោ​ដែល​ផលិត​បាន​ផង​ដែរ។ រហូត​ដល់​ឆ្នាំ ២០០៦ សមាគម​ចិញ្ចឹម​គោ​ទឹកដោះ​ត្រូវ​បាន​បង្កើត​ឡើង​។ ឆ្នាំ​ដដែល​នោះ​បាន​ទទួល​ជំនួយ​ពី​អង្គការ​កសិកម្ម​របស់​ជប៉ុន​បាន​មួយ​រយៈ​ខ្លី​តាមរយៈ​នាយកដ្ឋាន​ផលិតកម្ម​និង​បសុព្យាបាល​។

ប៉ុន្តែ​គម្រោង​ពង្រីក​ការ​ចិញ្ចឹម​គោ​ទឹកដោះ​នេះ​មិន​ទទួល​បាន​ជោគជ័យ​ជា​ផ្លែផ្លា​គួរ​ឲ្យ​កត់សម្គាល់​នោះ​ទេ។ លោក​កែវ ស៊ុន ដែល​បច្ចុប្បន្ន​មាន​តួនាទី​ជា​ប្រធាន​ស្តីទី​នៃ​សមាគម​ថ្លែង​ថា ការ​មិន​មាន​សាមគ្គីភាព​រវាង​សមាជិក​នៅក្នុង​សមាគម​បាន​និង​ខ្វះខាត​ដើមទុន និង​បច្ចេកទេស​ជា​ហេតុ​ធ្វើឲ្យ​ការ​ផលិត​នៅ​ទ្រឹង​គ្មាន​ភាព​រីកចម្រើន​ទាល់តែ​សោះ។

លោក​បាន​ថ្លែង​ថា៖ «តាំងពី​ការ​ចាប់ផ្តើម​ចិញ្ចឹម​នៅ​ឆ្នាំ​២០០០​មក យ៉ាង​ហោចណាស់​គោ​ទឹកដោះ​ដែល​បាន​កើត​និង​ចិញ្ចឹម​ក៏​មាន​១០០​ក្បាល​ដែរ តែ​អ្នក​ចិញ្ចឹម​ចេះ​តែ​លក់ នៅពេល​គោ​ឡើង​ថ្លៃ ឬ​ពេល​ពួកគេ​ខ្វះខាត​លុយ​កាក់​ក្នុង​ផ្ទះ។ ការ​ថែរក្សា​និង​បច្ចេកទេស​ក្នុង​ការ​ចិញ្ចឹម​ទាមទារ​ឲ្យ​មាន​ការ​យក​ចិត្ត​ទុក​ដាក់​ខ្លាំង​និង​មាន​កម្លាំង​ពលកម្ម​ដើម្បី​នៅ​មើលថែ ដោយសារ​គោ​ទឹកដោះ​នេះ​ត្រូវការ​ត្រជាក់​និង​ចាញ់​កម្តៅ»។

កង្វះខាត​ទុន កម្លាំង​ពលកម្ម​និង​បច្ចេកទេស​ក្នុង​ការ​ចិញ្ចឹម​នៅ​តែ​ជា​បញ្ហា​ប្រឈម​សម្រាប់​កសិករ​។

លោក​ឲ្យ​ដឹង​ថា គោ​ទឹកដោះ​អាច​រឹត​បាន​ចាប់​តាំងពី​វា​កើត​កូន​ដំបូង រហូត​ដល់​៧​ខែ។ ក្នុង​មួយ​ថ្ងៃ​អាច​រឹត​បាន​ពី​៥​ទៅ​១០​លីត្រ ដោយ​ក្នុង​មួយ​លីត្រ​អាច​លក់​បាន​ក្នុង​តម្លៃ​៤០០០​រៀល​ជា​តម្លៃ​លក់​ដុំ។

បច្ចុប្បន្ន គោ​ដែល​មាន​នៅក្នុង​សមាគម​មាន​ចំនួន​ប្រមាណ​ជិត​២០​ក្បាល និង​អាច​ផលិត​បាន​ចំនួន​៥០​លីត្រ​ប៉ុណ្ណោះ​ក្នុង​មួយ​ថ្ងៃ។ លោក កែវ ស៊ុន បន្ត​ថា គោ​ដែល​ផ្តល់​ចំណី​ឲ្យ​វា​ស៊ី​និង​ដេក​បាន​គ្រប់គ្រាន់​អាច​ផ្តល់​ទឹកដោះ​ពី​១៥​ទៅ​២០​លីត្រ​ក្នុង​មួយ​ថ្ងៃ។ បច្ចុប្បន្ន​ទឹកដោះគោ​ដែល​យើង​រឹត​យក​បាន​ស្ថិត​ក្រោម​កម្រិត​ស្តង់ដារ​នៅ​ឡើយ​។

ជាមួយ​គ្នា​នេះ​ដែរ លោក យ៉ង សាំងកុមារ ប្រធាន​អង្គការ​សេដាក​ឲ្យ​ដឹង​ថា ការ​ចិញ្ចឹម​គោ​យក​ទឹកដោះ​នេះ​ជា​រឿង​ថ្មី​សម្រាប់​កសិករ​។ លោក​ថា ធ្លាប់​មាន​ការ​ចិញ្ចឹម​គោ​យក​ទឹកដោះ​នេះ​ជា​លក្ខណៈ គ្រួសារ​តូចៗ ដែល​ទទួល​បាន​ជោគជ័យ​តាមរយៈការ​បង្កាត់​ពូជ​សិប្បនិម្មិត តែ​ថា​កង្វះ​ទុន បច្ចេកទេស និង​សម្ភារ​កែច្នៃ​ទឹកដោះ​គោ​ដែល​ផលិត​បាន ជា​ឧបសគ្គ​ធ្វើឲ្យ​ការ​ផលិត​នៅ​មាន​តិចតួច បើ​ទោះបី​ជា​តម្រូវការ​ក្នុង​ទីផ្សារ​ត្រូវ​បាន​គេ​មើល​ឃើញ​ថា​មាន​ទំហំ​ធំ​ក៏ដោយ​។

លោក​ថ្លែង​ថា៖ «មាន​កសិករ​យើង​គាត់​ចិញ្ចឹម​ដែរ​ក្នុង​លក្ខណៈ​គ្រួសារ​តូចៗ។ ទីផ្សារ​នៅ​ធំ កសិករ​យើង​នៅ​ត្រូវការ​ច្រើន​ទាំង​បច្ចេកទេស ទាំង​ដើមទុន និង​សម្ភារ​ចាំបាច់​ដើម្បី​ផលិត​ឲ្យ​គ្រប់​តាម​តម្រូវការ​។ ពួកគាត់​ក៏​ត្រូវ​ផ្លាស់ប្តូរ​គំនិត​ពី​ការ​ចិញ្ចឹម​ដើម្បី​យក​កម្លាំង​អូសទាញ​មក​ជា​ការ​ចិញ្ចឹម​យក​សាច់​ឬ​ទឹកដោះ​គោ​វិញ​ដែល​នឹង​អាច​ជួយ​ជីវភាព​ពួកគាត់​ថែម​ទៀត​»។

កិច្ច​ខិតខំ​ប្រឹងប្រែង​ដើម្បី​នាំ​មក​វិញ​នូវ​ប្រវត្តិសាស្រ្ត​នៃ​ការ​ផលិត​ទឹកដោះគោ​របស់​កម្ពុជា ត្រូវ​បាន​បង្ហាញ​ឡើង​តាំងពី​ឆ្នាំ​១៩៩៨ នៅពេល​ដែល​ក្រុមហ៊ុន Nestle ពង្រីក​ចង្វាក់​ផលិតកម្ម​របស់​ខ្លួន​មក​កម្ពុជា តែ​គម្រោង​នេះ​ត្រូវ​បរាជ័យ​នៅ​ប៉ុន្មាន​ឆ្នាំ​ក្រោយមក។

កំណើន​តម្រូវការ​នៃ​ផលិតផល​ពី​ទឹកដោះ​ដែល​បន្ត​កើនឡើង​បាន​ទាក់ទាញ​ក្រុមហ៊ុន​ធំៗ​ជាច្រើន​ដាក់​ទុន​វិនិយោគ​ក្នុង​វិស័យ​នេះ។ ទោះ​ជា​យ៉ាងណា​គម្រោង​វិនិយោគ​ទាំងនោះ​នៅ​មិន​ទាន់​បង្ហាញ​ផ្លែផ្កា​នៅ​ឡើយ​ទេ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ។

ជាក់ស្តែង​គម្រោង​វិនិយោគ​រួមគ្នា​ចំនួន​២,៥​លាន​ដុល្លារ​រវាង​ក្រុមហ៊ុន 7NG Group នៅ​ឆ្នាំ​២០១១​ជាមួយ​ក្រុមហ៊ុន HPT Dairy Company របស់​ស៊ុយអែត លើ​កសិដ្ឋាន​ចិញ្ចឹម​គោ​ទឹកដោះ​និង​រោងចក្រ ដែល​ត្រូវ​បាន​រំពឹង​ថា​នឹង​អាច​ផលិត​បាន ​១,២​លាន​តោន​ទឹកដោះគោ​ក្នុង​មួយ​ឆ្នាំ​នោះ រហូត​មក​ទល់​ពេល​នេះ​ក៏​មិន​ទាន់​លេច​ចេញ​ជា​រូបរាង​នៅ​ឡើយ​ដែរ។

ចំណែក ក្រុមហ៊ុន ម៉ុង ឫទ្ធី គ្រុប (MRG) ដែល​បាន​វិនិយោគ​រួម​ទឹកប្រាក់​ចំនួន​២៧​លាន​ដុល្លារ​ជាមួយ​ក្រុមហ៊ុន​ពី​ប្រទេស​អង់គ្លេស Lordswood Farm Ltd លើ​កសិដ្ឋាន និង​រោងចក្រ​ដើម្បី​ផ្គត់ផ្គង់​ទាំង​សាច់​និង​ទឹកដោះគោ​កាលពី​ឆ្នាំ ២០០៩​កន្លងមក​ក៏​មិន​ទាន់​ចាប់ផ្តើម​នៅ​ឡើយ​ដែរ។

លោក ម៉ុង ឫទ្ធី ប្រធាន​ក្រុមហ៊ុន ម៉ុង ឫទ្ធីគ្រុប​បាន​ឲ្យ​ដឹងថា គម្រោង​វិនិយោគ​នេះ​បច្ចុប្បន្ន​កំពុង​ជាប់​គាំង​ដោយសារ​ កង្វះ​ការ​ផលិត​ចំណី​គោ​ ក្នុង​ស្រុក​ដែល​មិន​ធានា​និរន្តរភាព​នៃ​គម្រោង​ទាំង​មូល​។ លោក​ថ្លែង​ថា៖ «ប្រសិន​បើ​បញ្ហា​ចំណី​នេះ​ដោះស្រាយ​មិន​ចេញ​ទេ គម្រោង​នេះ​ត្រូវ​បរាជ័យ​ហើយ​»។

លោក​បន្ត​ថា តម្រូវការ​សម្រាប់​ផលិតផល​ចេញ​ពី​ទឹកដោះ​គោ​នៅ​កម្ពុជា​មាន​ភាព​ទូលំទូលាយ​ណាស់​។ គម្រោង​កសិដ្ឋាន​របស់​លោក​ដែល​នឹង​ចិញ្ចឹម​គោ​១០០០​ក្បាល ហើយ​គោ​មួយ​ក្បាល​អាច​ផលិត​បាន​ទឹកដោះ​ចំនួន ​២០​លីត្រ​ក្នុង​មួយ​ថ្ងៃ នឹង​អាច​ផ្គត់ផ្គង់​តែ​១០​ភាគរយ​នៃ​ចំណែក​ទីផ្សារ​បច្ចុប្បន្ន​ប៉ុណ្ណោះ។

លោក​បាន​បញ្ជាក់​ថា៖ «កម្ពុជា​សព្វថ្ងៃ​នាំ​ចូល​១០០​ភាគរយ​នៃ​ផលិតផល​ទឹកដោះគោ។ យើង​ត្រូវការ​កសិដ្ឋាន​ចំនួន​១០ ហើយ​ត្រូវ​ចិញ្ចឹម​គោ​១០០០​ក្បាល​ក្នុង​មួយ​កសិដ្ឋាន ដែល​គោ​មួយ​ក្បាល​ត្រូវ​ផ្តល់​ទឹកដោះ​ពី​ ២០​ទៅ​៣០​លីត្រ​ ទើប​គ្រប់​តាម​តម្រូវការ​»។

ដោយ​មើល​ឃើញ​រួច​ហើយ​នូវ​សក្តានុពល​នៃ​ទីផ្សារ លោក កែវ ស៊ុន មាន​ប្រសាសន៍​ថា ការ​ចិញ្ចឹម​គោ​ទឹកដោះ​លក្ខណៈ​គ្រួសារ​អាច​នឹង​ចាប់​យក​ចំណែក​ទីផ្សារ​ដែល​មាន​ឥឡូវ​នេះ តែ​ថា ការងារ​នេះ​ត្រូវការ​ពេលវេលា​ច្រើន។ លោក​ថា៖ «ឥឡូវ​នេះ យើង​កំពុង​ព្យាយាម​ពង្រីក​ការ​ផលិត​របស់​យើង។ ទីផ្សារ​មាន​ហើយ ពេល​ណា​ដែល​កសិករ​ផលិត​បាន​ក្នុង​កម្រិត​មួយ​ដែល​គ្រប់គ្រាន់ យើង​អាច​ចាប់ផ្តើម​ការ​កែច្នៃ និង​ចាប់​យក​ទីផ្សារ​ធំ តែ​វា​ត្រូវការ​ពេល និង​ដើមទុន​។ វា​ត្រូវការ​ពេល​យូរ​បន្តិច ព្រោះ​យើង​កំពុង​ដើរ​ដោយ​សន្សឹមៗ»។ ទឹកដោះគោ​ដែល​ផលិត​បាន​ត្រូវ​ចែកចាយ​ទៅ​អតិថិជន​ជា​ប្រចាំ​តាម​ភោជនីយដ្ឋាន ហាង​នានា ហើយ​ក៏​ត្រូវ​បាន​បញ្ជូន​ទៅ​កន្លែង​ផលិត​ឈីស​របស់​ជនជាតិ​អ៊ីតាលី​នៅ​ខេត្ត​សៀមរាប​ផង​ដែរ។ ពុំ​មាន​របាយការណ៍​ផ្លូវការ​ពី​រដ្ឋាភិបាល​បង្ហាញ​ថា​តើ​កម្ពុជា​មាន​តម្រូវការ​ប្រើប្រាស់​ចំនួន​ប៉ុន្មាន​តោន និង​នាំចូល​ចំនួន​ប៉ុន្មាន​នោះ​ទេ ក្នុង​១​ឆ្នាំៗ៕