(ថ្ងៃទី 11 តុលា 2013, ម៉ោង 04:56:PM) | ដោយ: វិចិត្រ CEN:
ភ្នំពេញ:
នៅទីស្តីការក្រសួងការពារជាតិ នារសៀលថ្ងៃសុក្រនេះ
លោក នាង ផាត រដ្ឋលរខាធិការក្រសួងការពារជាតិ
បានទទួលជួបលោកវរសេនីយ៍ឯក Direck Bongkan សេនានុព័ន្ធយោធាថៃ
ប្រចាំកម្ពុជា ដែលត្រូវបញ្ចប់បេសកកម្ម នៅកម្ពុជា។ លោក វរសេនីយ៍ឯក Direck Bongkan មានប្រសាសន៍ថា នៅក្នុងជំនួបនោះ ភាគីទាំងពីរ បានសន្យាថា នឹងជំរុញឲ្យមានទំនាក់ទំនងកាន់តែល្អថែមទៀត លើគ្រប់វិស័យ ពិសេសនៅតាមតំបន់ព្រំដែន ដើម្បីប្រយោជន៍នៃប្រជាជនប្រទេសទាំងពីរ។
ចំណែកលោកនាយឧត្ត មសេនីយ៍ នាង ផាត មានប្រសាសន៍ថា ទំនាក់ទំនងកម្ពុជា-ថៃ បានល្អប្រសើរឡើងវិញ ក្នុងពេលចុងក្រោយនេះ ពោលគឺបន្ទាប់ពីលោកជំទាវ យីង ឡាក់ ដឹកនាំរាជរដ្ឋាភិបាល។
ប៉ុន្តែយ៉ាងណាក៏ដោយ តំណាងមេទ័ពទាំងពីរ បានបញ្ជាក់ថា ភាគីកម្ពុជា និងថៃ នៅមានការងារជាច្រើនទៀត ដើម្បីប្រជុំពិភាក្សាគ្នា ក្នុងការធ្វើឲ្យកាន់តែប្រសើរថែមទៀត គឺធ្វើឲ្យតំបន់ព្រំដែនមានសន្តិភាព និងអភិវឌ្ឍន៍។
កម្ពុជា និងថៃ ផ្ទុះសង្គ្រាមព្រំដែន ចាប់តាំងពីថ្ងៃទី១៥កក្កដា ឆ្នាំ២០០៨ ខណៈដែលកងទ័ពថៃ បានលើកគ្នា ចូលមកឈរជើងលើដីជាប់ប្រាសាទព្រះវិហារ ហើយប្រកាសថា ជាទឹកដីរបស់ថៃ។ ការប្រឈមមុខនោះ បានបង្កជាសង្គ្រាមជាច្រើនលើក នាំឲ្យកងទ័ព និងប្រជាជនប្រទេសទាំងពីរ ស្លាប់ និងរបួសជាច្រើននាក់។
ចុងក្រោយនេះ បន្ទាប់ថៃ មានរដ្ឋាភិបាលថ្មី ដែលដឹកនាំដោយលោកស្រី យ៉ីងឡាក់ កាលពីខែសីហា ឆ្នាំ២០១១ កម្ពុជា និងថៃ លែងមានជម្លោះប្រដាប់អាវុធ ហើយសំណុំរឿងក្តីនោះ ត្រូវបានប្តឹងទៅកាន់តុលាការឡាអេ ដើម្បីសុំឲ្យបកស្រាយសាលដីកា ឆ្នាំ១៩៦២ អំពីប្រាសាទព្រះវិហារ ដើម្បីដឹងថា ដីនៅជាប់ប្រាសាទព្រះវិហារ ដែលប្រទាញប្រទង់នោះ ស្ថិតនៅក្នុងទឹកដីកម្ពុជា ឬក៏ជារបស់ថៃ។
តាមគម្រោង សាលដីកាលើសំណុំរឿងក្តីបកស្រាយសាលក្រម ដែលតុលាការឡាអេ បានបើកសវនាការ កាលពីពេលចូលឆ្នាំខ្មែរ កាលពីខែមេសានោះ នឹងត្រូវប្រកាស នៅខែតុលានេះ៕
No comments:
Post a Comment